Ngiring Malajah Basa Bali: Pidarta Basa Bali

Pidarta Basa Bali

Tetujon paplajahan inggih punika mangda sisia prasida:

nlatarang teges pidarta basa Bali.
nlatarang wangun utawi struktur pidarta basa Bali.
nlatarang tetikesan mapidarta basa Bali.
nlatarang teknik mapidarta basa Bali.
mapidarta basa Bali nganggé téks wiadin hafalan

A. Teges Pidarta Basa Bali

Seni ngraos nganggé basa Bali sané dados sarana ngwedarang daging pikayun tetujoné mangda sang miarsayang ngresepang utawi nglaksanayang napi sané kawedar.

B. Unteng Pidarta

Makasami indik prasida dados unteng utawi tema pidarta, sajabaning (kecuali) ngenénin indik daging-daging ajahan agama. Niki kabaos darma wacana. Unteng pidarta sakadi indik Hardiknas, lingkungan, Protokol Keséhatan, Siaga Bencana, miwah sané lianan.

C. Wangun/Struktur Téks Pidarta Basa Bali

Struktur téks pidarta basa Bali ingih punika pamahbah, daging, miwah pamuput.

1. Pamahbah

Pangastungkara
Pangayubagia ring Ida Sang Hyang Widi Wasa
Pangaksama
Nyihnayang déwék
Ngaturang murda

2. Daging

Madaging unteng utawi isi pidarta.

3. Pamuput

Pamicutet
Matur suksma
Nunas pangampura
Parama santi

D. Tetikesan Pidarta

Ri kala mapidarta patut nguratiang tetikesan mangda pidarta sané kawedar prasida nudut kayun sang sané mirengang. Tetikesan pidarta luir ipun:

1. Wirama

Suara/vocal sané tinglas, onék-onékan/pengucapan anut ring kruna, labuh suara/intonasi sané becik, anut ring cecirén pepaosan (tanda baca).

2. Wirasa

Wirasa ngenénin indik semita utawi penjiwaan/éksprési.

3. Wiraga

Gerak utawi géstur anut ring daging pidarta, sakadi tetikesan penyingakan, tangan, sirah, anggan (badan).

4. Wicara

Ngenénin indik unteng/téma pidarta saha nganggén anggah-ungguhing basa sané becik

E. Téknik Mapidarta

Wénten pat téknik mapidarta sakadi ring sor puniki.

1. Pidarta Tutur (Impromptu)

Pidarta dadakan, spontan nénten nganggé teks.

2. Pidarta Sasuratan (Naskah)

Sampun kasiagayang naskah sané kawacén.

3. Pidarta Arda Tutur (Ekstemporan)

Nganggé ringkesan, wantah madaging bantang-bantang bebaosan.

4. Pidarta Mémoritér (Menghafal)

Ri kala mapidarta nénten nganggé teks. Nanging, sadurungné téks sampun kakaryanin tur kaplajahin mangda sida hafal.

F. Imba Téks Pidarta

Dohin Narkoba, Ngwangun Spéndusa sané ‘Bersinar’

Om Swastyastu,

Bapak Kepala Sekolah sané mustikayang titiang

Bapak/Ibu Guru kalih pegawai sané wangiang titiang

Para sameton sisia kelas VII, VIII, miwah IX sané tresna sihin titiang

Rumasa manubagia pisan sangkaning paswécan Ida Sang Hayang Widhi Wasa prasida ngaturang pidarta ring pakéling wanti warsa SMP Negeri 2 Sawan rahina mangkin. Titiang sampun rumasa ring padéwékan titiang kantun tambet, bilih-bilih ten uning ring anggah-ungguhing basa basita nanging pangkah titiang ngaturang pidarta puniki ten bina sakadi i kunang-kunang anarung sasi, pongah ngajahin bébék nglangi.

Ring galah becik puniki titiang pinaka angga sisia kelas VIII jagi ngaturang pidarta sané mamurda ‘Dohin Narkoba, Ngwangun Spéndusa sané ‘Bersinar’.

Ida dané sareng sami sané wangiang titiang, minabang sami sampun uning indik Narkoba inggih punika zat utawi obat-obatan sané terlarang, sakadi sabu, heroin, ekstasi, miwah sané lianan. Mawinan sampun kasengguh ‘terlarang’ olih Pemerintah, Narkoba puniki patut kadohin. Pamekas iraga para sisia mangda nénten pisan ngindayang ngajeng Narkoba utawi dados pengédar Narkoba.

Napi mawinan sakadi asapunika? Narkoba prasida ngusak keséhatan, ngawinang metu parilaksana corah sakadi mamaling, biota, ngusak saraf otak ngawinang nénten prasida mapepineh sané becik. Sangkaning ngajeng narkoba taler makada sering kiap, males, nénten rungu ring padéwekan napi malih tekening anak lian.

Bapak Kepala Sekolah, Bapak Ibu/Guru, miwah sameton titiang sareng sami, saantukan Narkoba mapuara kaon ngiring sané mangkin sareng sami mautsaha ngedohin Narkoba punika mangda sida ngwangun sekolah pamekas SMP Negeri 2 Sawan sané ‘Bersinar’, Bersih dari Narkoba. Utsaha-utsaha sané patut iraga laksanaang minakadiipun:

1. nglaksanayang parikrama utawi kegiatan sané becik utawi positif, sakadi malajah, olahraga.

2. milihin pergaulan sané becik. Nénten gradag-grudug sareng anak sané demen mamunyah mawinan perédaran Narkoba akéh ring genah jadmané sané seneng mamunyah.

3. setata yatna utawi tangar majeng ring anak lian. Mawinan wénten modus penyebaran Narkoba nganggén ajeng-ajengan utawi inum-inuman sané madaging Narkoba.

4. yéning madué pikobet sajeroning urip mangda kabaosang ring sang sané patut sakadi rerema, guru ring sekolah, mangda kaicénin pamargi sané becik. Akéh anaké sané keni Narkoba sangkaning frustasi saha nénten polih sesuluh sané patut.

Ida dané sareng sami, yéning cutetang indik sané sampun titiang aturang iwau inggih punika Narkoba pinaka obat-obatan terlarang patut pisan iraga dohin madasar setata yatna utawi sayaga ring raga, malaksana sané becik, mangda prasida ngwangun SMP Negeri 2 Sawan puniki sané Bersih dari Narkoba utawi ‘Bersinar’.

Bapak Kepala Sekolah, Bapak/Ibu Guru kalih pegawai, miwah sameton para sisia sané wangiang titiang, wantah sakadi asapunika titiang ngaturang pidarta dumugi wénten pikenohnyané. Titiang ngaturang suksma antuk uratian ida dané. Sampun pastika wénten kakirangan titiang ri kala ngaturang pidarta iwau. Wantah Klungkung Semarapura, kirang langkung titiang nunas pangampura. Pinaka wasananing atur, titiang ngaturang parama santi.

Om santi, santi, santi om.

G. Analisis Struktur Téks Pidarta ring Ajeng