Materi Paplajahan: Satua Tantri

Materi Paplajahan: Satua Tantri

Tetujon paplajahan inggih punika:
1. mangda prasida ngwacén satua Tantri maksara Bali miwah aksara latin.

2. mangda para sisia tatas uning ring daging satua Tantri sané kawacén.

3. prasida ngresepang nilai-nilai moral sané wénten ring satua Tantri

A. Teges Satua Tantri

Satua utawi carita Tantri mawit saking panegara Bharata Warsa utawi India sané kawastanin Panca Tantra. Manut ring asil panyelehan olih para sujana raris ring Bali kocap katemuang makudang-kudang pustaka carita Tantri sane kasengguh Tri Tantri Uttama. Papalihan ipun sakadi:

1. Kidung Tantri Nandaka Harana sané kawangun olih Ida Padanda Nyoman Pidada sareng Ida Padanda Ketut Pidada, duk warsa ring icaka 1630 utawi 1728 maséhi. Maka kalih pangawi inucap Griyan Ida ring Gria Punia, Sidemen, Karangasém.

2. Kidung Tantri Manduka Prakarana utawi Kidung Raga Winasa kawangun oih I Gusti Made Tangeb taler saking Desa Sidemen Karangasém.

3. Kidung Tantri Pisaca Harana, kawangun olih Ida Padanda Sidemen saking Gria Intaran Sanur. Kidung punika kawangun sawatara warsa icaka 1860-1866 utawi 1938-1944 maséhi. Ring sajeroning Kidung Tantri Nandaka Harana puniki wénten munggah silih sinunggil ajahan sané kawastanin Pati Brata, inggih punika ajahan sane misaratang indik kasujatian anak istri nelebang sasanannyané ngraksa raga pinaka luh luih, anak istri motama, miwah bakti ring rerama.

B. Imba Satua Tantri Maksara Bali

Satur Tantri ring ajeng dados kaunduh ring link puniki: http://bit.ly/satuatantri

C. Kosa Basa

Yening selehin satua Tantri ring ajeng, wénten makudang-kudang kruna sané arang kapanggihin dadosné sukil karesepang. Ring sor puniki wénten makudang-kudang artos kruna sané patut kaplajahin mangda dangan ngresepang daging satua Tantri ring ajeng.

1. Kasapa = kacapatin
2. Kirti = yasa, tapa
3. Kanggek = masandekan ajebos
4. Kagutil = kacegut
5. Acreng = nelik (pandangan tajam)
6. Krura = nakutin
7. Katiwakin = katibenin, kaketisin
8. Dasa Bayu = aksara pengurip
9. Niskarya = tan paguna
10. Kengin = dot
11. Lina = lebar, séda
12. Jambat = doh
13. Pajar = baos, atur
14. Kasumbung = kawistara (terkenal)

Mangda kaweruhan indik kosabasa Bali nincap dados ngrereh artos kruna ring kamus daring Bahasa Bali-Indonesia, unduh ring playstore utawi ngranjing ring link http://kamusbahasaprovinsibali.id/. Dados taler ngranjing ring menu daftar link penting sané wénten ring blog puniki.

D. Satua Tantri Maksara Latin

Ring ajeng sampun kaicénin imba satua Tantri maksara Bali. Yening meweh ngwacén, ring sor punika jagi kaaturang sane maksara latin.

I Macan Kasapa Baan Ida Sang Pandita

Sane riin wénten brahmana maparab Dang Hyang Manawa, sampun puputing kirti, kasumbung wak bajra sidi wak, uning ida ngidupang ané suba mati. Sawiréh sampun atas antuk ida mamawosin aksarané sami. Tatkala Ida budal ka pasraman, masusupan Ida ring alas alas gunungé. Pinih jambat pamargin Idané, mamanggihin bangkén macan. Kénginan kanggek pakahyunan ida tur ngandika, “Ih macan, apa krana né mati, jeneng iba kagutil baan lelipi?” asapunika baos antuk Ida Sang Resi Manawa.

Raris Ida mapahkayunan jagi ngidupang. Tumuli katiwakan dasa bayu. Acreng krura mrungut jagi nyarap. Mawacana Ida Sang Resi Manawa, “Duh cai Macan. Eda cai nyarap awaké. Awaké Sang Brahmana. Déwa sekala awaké di jagaté”. Sumaur I Macan, “Titiang ring Ida Sang Brahmana, wiréh wénten panugrahan déwa ring titiang mangsa manusa”. Wau sapunika pajaripun, rarisipun nyarap. Dadianya lina Sang Resi Manawa kabaksa antuk I Macan. Niskarya pisan buat sih piwelasanidané, tan uning buat nguna karayang. Sing ja buwungan lakar kataman pakéweh. Asapunika pajarnya Ni Wanari nuturang buat kajelékan macané. 

Kaketus saking Ni Dyah Tantri olih I Made Pasek.

E. Latihan
1. Napi murdan wacanané ring ajeng?
2. Sira sané kasapa olih Ida Sang Pandita?
3. Sapa sira parab Ida Sang Brahmana sané kasumbung sakti punika?
4. Napi mawinan Ida Sang Brahmana prasida ngidupang ané suba mati?
5. Napi sané kapanggihin olih Ida Sang Brahmana salantang margi ring alasé?
6. Sasubané I Macan maurip (idup) malih, sapunapi panadin caritané?
7. Napi kranané I Macan nagih nyarap Ida Sang Brahmana?
8. Saduaning I Macan nagih mamangsa Ida Pandita sapunapi raris pajar Sang Brahmana?
9. Napi unteng/tema carita Tantri punika?
10. Indayang surat pinih nista (minimal) kalih piteket utawi amanat ring satua punika!