Pidarta indik Narkoba

Dohin Narkoba, Ngwangun Spéndusa sané ‘Bersinar’

Om Swastyastu,
Bapak Kepala Sekolah sané mustikayang titiang
Bapak/Ibu Guru kalih pegawai sané wangiang titiang
Para sameton sisia kelas VII, VIII, miwah IX sané tresna sihin titiang

Rumasa manubagia pisan sangkaning paswécan Ida Sang Hayang Widhi Wasa prasida ngaturang pidarta ring pakeling wanti warsa SMP Negeri 2 Sawan rahina mangkin. Titiang sampun rumasa ring padéwékan titiang kantun tambet, bilih-bilih ten uning ring anggah-ungguhing basa basita nanging pangkah titiang ngaturang pidarta puniki ten bina sakadi i kunang-kunang anarung sasi, pongah ngajahin bébék nglangi.

Ring galah becik puniki titiang pinaka angga sisia kelas VIII jagi ngaturang pidarta sané mamurda ‘Dohin Narkoba, Ngwangun Spendusa sané ‘Bersinar’.

Ida dané sareng sami sané wangiang titiang, minabang sami sampun uning indik Narkoba inggih punika zat utawi obat-obatan sané terlarang, sakadi sabu, heroin, ekstasi, miwah sané lianan. Mawinan sampun kasengguh ‘terlarang’ olih Pemerintah, Narkoba puniki patut kadohin. Pamekas iraga para sisia mangda nénten pisan ngindayang ngajeng Narkoba utawi dados pengédar Narkoba.

Napi mawinan sakadi asapunika? Narkoba prasida ngusak keséhatan, ngawinang metu parilaksana corah sakadi mamaling, biota, ngusak saraf otak ngawinang nénten prasida mapepineh sané becik. Sangkaning ngajeng narkoba taler makada sering kiap, males, nénten rungu ring padéwekan napi malih tekening anak lian.

Bapak Kepala Sekolah, Bapak Ibu/Guru, miwah sameton titiang sareng sami, saantukan Narkoba mapuara kaon ngiring sané mangkin sareng sami mautsaha ngedohin Narkoba punika mangda sida ngwangun sekolah pamekas SMP Negeri 2 Sawan sané ‘Bersinar’, Bersih dari Narkoba. Utsaha-utsaha sané patut iraga laksanaang minakadiipun:

1. nglaksanayang parikrama utawi kegiatan sané becik utawi positif, sakadi malajah, olahraga.

2. milihin pergaulan sané becik. Nenten gradag-grudug sareng anak sané demen mamunyah mawinan peredaran Narkoba akéh ring genah jadmané sané seneng mamunyah.

3. setata yatna utawi tangar majeng ring anak lian. Mawinan wenten modus penyebaran Narkoba nganggén ajeng-ajengan utawi inum-inuman sané madaging Narkoba.

4. yéning madué pikobet sajeroning urip mangda kabaosang ring sang sané patut sakadi rerema, guru ring sekolah mangda kaicénin pamargi sané becik. Akéh anaké sané keni Narkoba sangkaning frustasi saha nenten polih sesuluh sané patut.

Ida dané sareng sami, yéning cutetang indik sané sampun titiang aturang iwau inggih punika Narkoba pinaka obat-obatan terlarang patut pisan iraga dohin madasar setata yatna utawi sayaga ring raga, malaksana sané becik, mangda prasida ngwangun SMP Negeri 2 Sawan puniki sané Bersih dari Narkoba utawi ‘Bersinar’.

Bapak Kepala Sekolah, Bapak/Ibu Guru kalih pegawai, miwah sameton para sisia sané wangiang titiang, wantah sakadi asapunika titiang ngaturang pidarta dumogi wénten pikenohnyané. Titiang ngaturang suksma antuk uratian ida dané. Sampun pastika wénten kakirangan titiang ri kala ngaturang pidarta iwau. Wantah Klungkung Semarapura, kirang langkung titiang nuas pangampura. Pinaka wasananing atur, titiang ngaturang parama santi.

Om santi, santi, santi om.