Materi Paplajahan: Puisi Bali Anyar

Materi Paplajahan: Puisi Bali Anyar

Tetujon paplajahan inggih punika:
1. mangda prasida nlatarang teges puisi Bali anyar.
2. nlatarang uger-uger ngwacén puisi Bali anyar.
3. ngwacén puisi Bali anyar.

A. Teges Puisi Bali Anyar

Manut aab jagat puisi Bali Anyar kaepah dados kakalih inggih punika puisi Bali purwa miwah puisi Bali anyar. Manut kakuub kasusastraan Bali, puisi Bali anyar ngranjing ring kasusastraan Bali anyar. Puisi Bali anyar inggih punika karya sastra rikala ngametuang manah tatueké nganggén sarana basa Bali tur susunannyané kaiket nganutin kapatehan suara, wirama, wirasa, miwah kosa basa.

Puisi Bali purwa imbannyané tembang sakadi sekar raré, sekar alit, sekar madia, miwah sekar agung sané kaiket antuk uger-uger pada lingsa miwah guru lagu. Nanging, puisi Bali anyar inggih punika karya sastra sané nganggén basa Bali tur wangunnyané kaiket antuk wirama (irama), wirasa (penjiwaan), miwah kosa basa.

B. Uger-uger Ngwacén Puisi Bali Anyar

Puisi Bali Anyar dados kawacén utawi kadéklamasiang. Sané patut uratiang ri kala ngwacén puisi Bali Anyar mangda kapireng becik inggih puniki sakadi ring sor puniki.

1. Wirasa utawi Interprétasi

Wirasa inggih punika panarkan/penafsiran ngenénin indik daging utawi unteng puisi. Yéning sampun resep indik daging puisi pastika sampun uning indik puisiné punika napiké indik pendidikan, lingkungan, utawi kritik sosial.

2. Wirama utawi Olah Vokal

Wirama inggih punika intonasi ri kala ngwacen puisi. Tatas uning ring wirama pastika sampun uning ring kruna utawi lengkara sané encén sapatutne masuara alus, banban, utawi keras.

3. Semita utawi Éksprési

Semita inggih puniki tata wedana utawi raras (raut muka) sang ngwacén puisi nganutin daging puisi.

4.Wiraga utawi Olah Tubuh

Wiraga wantah gerakan tubuh sané kacinahyang antuk pidabdab ring sajeroning ngwacén puisi sekadi mamargi, matindakan, malinggih ring kursi, matimpuh, nundik, nelik, miwah sané siosan.

6. Wates Lengkara

Wates lengkara indik tetuek ri kala ngwacén puisi kacihnayang ring dija sapatutné bebaosané majanggelan dadosné daging puisiné sida karesepang olih sang sane mirengang/pamiarsa.

C. Imba Pangwacénan Puisi Bali Anyar

Mangda sayan resep ring uger-uger ngwacén puisi Bali anyar, indayang tonton video ring link puniki. Napiké  sang sane ngwacé n puisi ring vidé o punika sampun nganutin uger-uger ngwacén puisi Bali anyar?

D. Murda Puisi Bali Anyar miwah Pangawiné
1. Basa Bali olih Suntari PR
2. Pura Agung Jagatnatha olih Wayan Rugeg Nataran.
3. Pancasila olih Anak Agung Gedé Rai.
4. Ngulah Kedis olih Nyoman Manda.
5. Cening Komang olih Nyoman Manda.
6. Margarana olih Wayan Rugeg Nataran.

E. Imba Puisi Bali Anyar

Margarana
Olih Wayan Rugeg Nataran

Driki tiang nguntul ngebiosang yéh mata
Kangen manah titiangé ngantenang
Tugu para pahlawané sami
Majéjér ngebekin tegalan
Pahlawan-pahlawan sané tan madué pamerih
Nyikiang raga mélanin negara
Ngicalang meseh jagi mawali
Nyajah gumin iraga

Duk punika warsa 1945
Jagat Indonésia sampun mahardika
Truna-truni dados pamucuk
Sakadi satria wira nangkepin meseh
Pejah ring rananggana
Punika kasengguh pahlawan
Kasub makuub jagat iraga
Sawiréh mahardika sané katuju
Sampun kaucapang sajeroning lambé
Kagenahang ring ati soang-soang
Sakadi masumpah sareng sami
Mati mélanin negara

Tan éling ring pianak somah
Arta berana matumpuk-tumpuk
Sami ngungsi genah ngaryanang gelar
Ring alas madurgama
Ngetohang urip sareng sami
Padem wiadin kantun pateh
Manahé sampun masikian.

F. Latihan 1

1. Puisi Bali Anyar ngranjing soroh kasusatraan napi?

2. Indayang sambatang miwah tlatarang uger-uger sané patut uratiang ri kala ngwacén puisi!

3. Napi unteng (tema) puisi Bali Anyar sane mamurda Margarana?

4. Napi pabesen utawi piteket puisi Bali Anyar sane mamurda Margarana?

5. Ring aab zaman globalisasi sakadi mangkin napi sané patut kalaksanayang anggén nagingin kemerdekaan?

G. Latihan 2

Mangda sayan resep ring uger-uger ngwacén puisi indayang cawis pitaken game édukasi ring link game edukasi puisi Bali anyar., utawi dados ngranjing ring menu daftar link penting  sané sampun wénten ring blog puniki.

H. Latihan 3

Indayang wacén puisi Margarana utawi dados puisi lianan nganutin uger-uger ngwacé n puisi Bali anyar!

Sumber Gambar: https://cute766.info/