Manut podcats (siniar) Mendikbudristék Nadiém Makarim sareng Bapak Présidén Jokowi sajeroning mikélingin Hari Pendidikan Nasional 2021, inggih punika program Merdéka Belajar jagi katincapang miwah kalimbakang mangda pendidikan ring Indonesia sayan becik. Lian ring punika taler kawedarang indik pembelajaran tatap muka (PTM) terbatas sané jagi kalaksanayang ring tahun pelajaran anyar, bulan Juli sané jagi rauh. Paplajahan durung kadadosang sakadi sekolah normal, nénten wénten ékstrakurikulér. Sekolah kicén nglaksanayang PTM pinih akéh wantah 50%. Mawinan kantun tatap muka terbatas, dadosné para sisia kantun malajah saking jumah.
Pembelajaran jarak jauh (PJJ) sané sampun mamargi kirang langkung awarsa gumanti durung prasida mamargi becik, akéh metu pikobet. Akéh sisia nénten gumana malajah, nénten ngirim tugas. Sané pinaka dadalan saking para sisia wantah kuota nanging kasujatiané akéh para sisia madué kuota nangih mayus malajah, seneng main game online timbang ngwacén materi utawi malajah daring miwah makarya tugas-tugas. Malajah luring ring jero saong-soang taler nénten gumana.
Pikobet ring ajeng patut iraga kayunin sareng-sareng utawi karerehang pamargi mangda paplajahan sané jagi rauh prasida mamargi sayan becik. Pinaka pamargi wantah nincapang malih sinérgi Tri Pusat Pendidikan sané kawedarang olih Ki Hajar Dewantara. Tri Pusat Pendidikan inggih punika pendidikan ring sekolah sané kaemban olih guru, pendidikan ring keluarga sané kaemban olih guru rupaka utawi rerama para sisia, miwah pendidikan ring pakraman sané kaemban olih i krama. Niki mangda mamagi sinarengan pinaka dasar ngwangun Merdéka Bélajar.
Guru madué swadarma nglimbakang karakter miwah kaweruhan para sisia nganutin panglimbak téknologi ring sekolah. Guru ngemban sisia mangda madué karakter, kaweruhan, miwah keterampilan mangda benjangan prasida katampi ring dunia kerja. Nanging, guru nénten prasida ngemban para sisia paragaan. Napi malih kawéntenan sakadi mangkin sajeroning PJJ para sisia akéhan galahné ring jero soang-soang sareng i rerama taler ring lingkungan masyarakat.
Pendidikan ring keluarga pinaka pendidikan sané pertama miwah utama. Guru rupaka patut ngajahin indik tata susila, ajah-ajahan agama, ngajahin pendidikan dasar, saha ngemban panglimbak émosional pianak. Ring PJJ sakadi mangkin rerama mangda setata ngwangun komunikasi sareng i pianak, mikélingin mangda setata malajah, sakadi nakénang program sekolah, miwah tugas-tugas sekolah. Tetujoné mangda uning panglimbak pendidikan taler uning pikobet i pianak.
Genah malajah para sisia nénten ja tuah ring sekolah. Manut Ki Hajar Dewantara makasami genah punika kabaos sekolah, makasami jadma kabaos guru. Niki mawinan lingkungan masyarakat mabuat pisan kawentenané sajeroning panglimbak para sisia. Lingkungan masyarakat pinaka genah para sisia nglimbakang kaweruhan sosial émosional. Lingkungan sané kaon pacang ngiusin para sisia malaksana sané kaon utawi nénten becik. Antuk punika, krama patut ngicénin pendidikan moral ring para sisia. Krama patut ngicenin tetuladan sané becik.
Sajeroning ngwangun Merdeka Belajar nenten prasida wantah sangkaning pendidikan ring sekolah. Guru rupaka miwah krama sapatutné mamargi sareng-sareng, madué pikayun sané pateh manut sakadi unteng/tema Hardiknas 2021 ‘Serentak Bergerak, Wujudkan Merdéka Belajar’.
 |
| Sumber gambar: siapbelajar.com |
Tidak ada komentar:
Posting Komentar