Materi Paplajahan: Kasusastraan Babad

Materi Paplajahan: Kasusastraan Babad

Tetujon paplajahan:
1. prasida nlatarang teges kasusastraan babad.
2. prasida ngwacén babad mabasa Bali.
3. prasida tatas uning ring daging punggelan babad mabasa Bali.

A. Kasusastraan Babad

Kasusastraan babad wantah pinaka sinalih tunggil awi-awian karya sastra sané ngranjing ring sajeroning wangun kasusastraan gancaran ring Bali. Kasusastraan babad embasnyané kirang langkung ngawit duk abad ka-16 maséhi. Babad wantah karya sastra sané madaging indik sejarah. Panadosné babad inggih punika silih sinunggil 'historiografi tradisonal'. Babad taler madaging indik kawitan/silsilah.

Kasusastraan babad taler marupa pamacanggah, uwug, usak, rug, usana, miwah paswara. Makasami punika nénten bina sakadi kasusastraan babad, sakéwanten marupa kepah-kepahan utawi canggah-canggahan saking kasusastraan babad sané madué tetujon nénten lian wantah pinaka patinget majeng ring pamargin para batara hyang lelangit soang-soang wangsa sané wénten ring Bali.

B. Imba Kasusastraan Babad

1. Babad Uwug Payangan: nyritayang indik payudan Buléléng sareng Payangan.
2. Babad Buléléng: nyritayang indik Ki Barak Panji Sakti nguasain jagat Dén Bukit.
3. Babad Pasek: silsilah Maha Gotra Sanak Sapta Resi
4. Pemancanggah Tangkas Koriagung: nyritayang keturunan Tangkas Koriagung
5. Babad Uwug Payangan: nyritayang indik payudan Buléléng sareng Payangan
6. Babad Usana Bali Pulina: nyritayang indik kawéntenan Pulau Bali duk dumun (masa lampau).
7. Babad Dukuh Suladri: silsilah keturunan Dukuh Suladri

C. Ngwacén Babad

Babad Buleleng

Om Awighnamastu

Sasampuné Raja Bedaulu ring Bali kakaonang antuk Sri Aji Kala Gemet, Bali prasida trepti. Patih Nirada Mada sungsut kayuné nyantenang geguat ring panegara karusak mawinan Dang Hyang Kapakisan kaunggahang pinaka bhagawanta. Okan Ida Pandita mijil saking batu saha marabi widyadari maputra tigang diri. Putranida karsaang antuk Gajah Mada mangda prasida ngamel jagat. Sane pinih duur ngamel jagat ring Blambangan, arin Ida ring Pasuruhan, saha sané pinih alit ring Bangsul (Bali) mapuspata Sri Dalem Kresna Kapakisan.

Risampuné Sri Dalem Kapakisan néwata, nilarin tigang diri oka minakadi Dalem Samprangan, Dalem Tarukan miwah Dalem Ketut. Dalem Ketut sané munggah ngentosin ajiné malingga stana ring Swécalinggarsapura. Risampuné néwata, kagentosin antuk okan Ida sané mapuspata Dalem Watu Renggong. Sang ngawa rat salanturnyane wantah Dalem Sagening.

Kacritayang mangkin, Si Luh Pasek Panji saking Désa Panji Dén Bukit pinaka punakawan Sri Aji Dalem Sagening. Metu kaman Ida ring punakawannyané saha kantos mobot. Sangkaning Ida uning jagi néwata, eling Ida ring ayah-ayahan Arya Jarantik majeng panegara. Si Luh Pasek Panji sané mobot kaicén ring Ki Gusti Ngurah Jarantik. Wénten piteket Dalem, mangda nénten nyampuhin kaman Ida miwah risampuné embas anaké alit sida kaangkenin oka kasametonang sané okané Ki Ngurah Jarantik. Embas raris anak alit sané maprabawa, metu teja ring ubun-ubun.

Ki Gusti Ngurah Jarantik dahat bagia saha anake alit kaupacarain antuk mapesengan Ki Barak Panji. Rabin Ki Ngurah Jarantik rumasa osah yéning okannyané kakaonang antuk Ki Barak Sakti. Ri sampuné Ki Barak Panji kelih, ngayah ring Sri Aji Dalem Sagening. Ida Dalem osah naler yening Ki Barak Sakti sané jagi munggah pinaka raja benjangan pungkur ngaonang okanida. Ki Barak Panji kanikain mantuk ring genah ibunnyané ring Desa Panji, Den Bukit. Pamargin Ki Barak Panji Sakti ka Desa Panji kairing antuk petang dasa punggawa tegep pasuécan marupa keris petang dasa.

Ri sampuné kaicén saka siki, setata kantun masisa asiki marupa Mundaran Cacaran Bangbang. Éling Ida Dalem yéning keris malih siki wantah pusaka majeng Ki Barak Panji, mawinan kerisé kawastanin Ki Barak Panji. Siosan punika wénten pasuécan marupa tombak mapesengan Ki Tunjung Tutur utawi Ki Pangkajatatwa. Mamargi Ki Gusti Panji ngruruh Dén Bukit ngauhang ring wewidangan Samprangan, kawisunya kantos ring Danu Pabaratan. Rauh ring Bukit Watu Saga Dén Bukit raris masandekan. Ki Dumpyung kanikain budal ngruruh toya, saha pusaka Ki Pangkajatatwa kaicén majeng Si Luh Pasek Panji mangda kabaktayang  dumun raris katancebang ring tanah. Saking tanahé raris medal toya ening, saha genahé mapesangan Banyu Anaman utawi Toya Katipat. Rauh raris ring Panji, Ki Gusti matemu sareng pasemetonané. Kacaritayang ring Panji wénten Ki Pungakan Gendis sané ngénterang jagat maalinggastana ring Désa Gendis. Manut ring sabda sané kapolihang, Ki Pungakan Gendis raris kapademang  antuk Ki Gusti Panji majalaran antuk keris pasuécan Ida Dalem. Wénten okan Ki Pungakan Gendis mapesengan I Dewa Ayu Juruh dahat listu ayu saha ariné lanang kantun alit. Sangkaning kantun alit, Ki Bendésa Gendis sané kanikain ngénterang Désa Gendis.

Kacritayang mangkin wénten jukung kampih ring pasisi Panimbangan duén Ki Mpu Awwang. Nglungsur wantuan raris Ki Bendésa Gendis saha katedunang panjakné sami nanging jukungé nénten prasida malayar ka tengahing segara. Pamuputné I Gusti Panji sané sida makta jukungé katengahing segara majalaran antuk keris Ida Dalem. Sami sané wénten ring jukungé kaicén ring Ki Gusti Panji nganutin semayan Ki Mpu Awwang. Mawit punika Ki Gusti Panji akéh madué arta brana. Risampuné mayusa kalih dasa warsa, Ki Gusti Panji sayan kasub saha sami mamarekan ring Ki Gusti Panji. Ki Gusti Ngurah Panji raris marabian sareng Ki Dewa Ayu Juruh. Linggastanan panegara raris kagingsirang ring Sangkét Sukada. Wénten Kyayi  Sasangkadri sané nénten kayun mamanjak mawinan kayudain antuk Ki Gusti Ngurah Panji. Kyayi Sasangkadri prasida kakaonang antuk Ki Gusti Ngurah Panji. Trepti wibuh Ki Gusti Ngurah Panji ngénterang jagat.

Kaketus saking Babad Buléléng

Kaolah oleh Kadék Widiantana

Sumber Gambar: https://www.balitoursclub.net/

D. Latihan

1. Nyihnayang indik napi wacana ring Ajeng?
2. Sira sané mawasta Sri Dalem Kapakisan?
3. Sira okané Dalem Ketut?
4. Sira wastan okané Si Luh Pasek?
5. Sira sané ngutus Ki Barak Panji Sakti mantuk ring genah ibunnyané?
6. Napi mawinan Ki Barak Panji Sakti kautus ngayah ring Sri Aji Dalem sagening?
7. Pamargin Ki Barak Panji ka Désa Panji kairing antuk?
8. Napi sane kabakta olih para punggawa ri kala ngiringang Ki Barak Panji Sakti?
9. Napi wastan pusaka Ki Barak Panji?
10. Napi semayan Ki Mpu Awwang majeng ring I Gusti Panji?