Uled Bulu

Sekar jepuné nadak layu

Runtuh katempuh don taru layu

Cihna guminé kantun tatu

Sami mapura tampu

Ten perlu sampunang nglalu

Sayan kalu nénten mupu

Purun dudu keni tantu

Mulat sarira mangda lalu

Patut kudu ngulati rahayu

Nuptupang bayu

Sakadi uled bulu

Mayasa siang dalu

Metu kupu-kupu

Nados ratu

Gitanjali

Sekar Mijil anggén milpil pakibeh gumine sukil

Tembang Maskumambang ngurip manah kaleson ngambang

Gemblung Pucung madaging puyung jagat gempung ten sayan ngungkung

Sengkala duka lara kalukat tirta suganda sekar Ginada

Erang morbor ambek adarma masrana dumilah dupa Durma

Mantra Om ngicalang laksanané kaon masekar Sinom lom

Mapunia Semarandana ngréka semara sih ngwangun buwana

Sujati ngastiti rahayun gumi mapiranti sekar Ginanti asri

Nglantur tutur Pangkur anggén nglebur nyujur kasukertan kapungkur

Pangaksama puja gita Dangdang Gula dumugi jagadita sekala niskala

                       (Ki Jugul, PPKM Darurat, 03/07/21)

Pidan Kadén

Suba atiban pariwisata mati
Turisé tusing ada malali
Ané ngisi gumi suba majanji
Bakat gelekang gati
Kanti leleh nganti

Kadén jani
Kadén mani
Dadi ati tusing masi misi

Pidan kadén
Madak énggal ngenén
Apang tusing setata pati kadén
      (Ki Jugul, 24/06/21)

Purnamaning Kasa

Purnamaning kasa

Déwasa nangun yasa
Karaksa luih pangrasa

Mapuja mantra saa
Magita nyatur désa
Masrana puspa dupa

Kagenahang ring tungtung arsa
Miik ngalub kabakta pawana
Rauh nyujuh ring akasa
Katodia Hyang Widi Wasa

Nglebur lara roga dosa
Ngret indria sané mamaksa
Ngicalang angkara marikosa
Ngruat mala sané nguasa

Pangarsa Purnama kasa
Dumugi buana santosa
Saking pralaya nuju kreta masa

(Ki Jugul, 24/06/21)

Jero Korona

Yening batbat sayan nglimbak

Sayan uug yening purun mamurug

Yening kasaru sayan sengkala tan patanggu

Sayan benyah yening abah manusa ampah


Gering agung kawangiang patut

Icén margi nénten ngawe pati

Saksat bikul kabaosang Jero Ketut

Usan nyengkalén wong tani


Gering agung sasab mrana

Patut kasengguh Jero Korona

Kasapa kaupacara sekala niskala

Mangda nenten nyansan raat daging buana

Jero Korona rarisang mamargi

Sampun sué nguasa siang ratri

Jero Korona sampunang mawali

Icén galah manusa ngwangun gumi

        (Ki Jugul, 18/06/2021)

Ampura Guru

Saking niskala guru ngadakang tiang

Madasar patemoning Hyang Ratih miwah Semara

Wit makasami wit ring maya pada

Ngicénin uirip kabaos Sang Hyang Jagat Karana

Nanging ampura pangubaktin titiang kantun tuna


Saking garba guru ngemit tiang

Kantos embas ka jagat pada

Ten ngétang sengsara duka lara

Madasar tresna sih kaupapira

Nanging ampura durung sida ngwales ban tresna muah arta brana


Saking alit guru ngajahin tiang

Maka dadalan tiang nawang

Paundukan idupé beneh kalawan iwang

Kaweruhan tata susila dasar ngunadikayang

Nanging ampura durung paripurna tiang nglaksanayang


Saking kajajah kantos dados panegara

Guru nabdabang jagaté kerta raharja

Sida tiang ngisinin idup ring sekala

Masekolah ngrereh pangupajiwa

Nanging ampura durung kukuh titiang makrama nyalanang darmaning negara

                      (Ki Jugul, 17/06/2021)

Sayah

Guminé nedeng sayah

Enu masi gagah pangenah

Tusing dadi kalah

Matograh nyama gelah

Tegak umah dadi kantah

Akéténg tusing ngelah

Makejang telah bah sayan layah

Guminé nedeng sayah

Pabedikin abah cékah muah ampah

Malaksana ané tawah-tawah

Rajah tamah pragat nagih nadah

Apang tusing sanget benyah

Idupé osah sirepé blangsah

Sakité ngahngah

Sengsarané ngahkah

Kanti ngakah

Guminé nedeng sayah

Maka cihna suba wayah

Sugih lacuré asah

Ngastiti Sang Hyang Titah

Apang tusing kena raja pinulah

Laksanané corah jalan uah

Mulat sarira apang katah

Dasarin itep ngayah

Caluhang yatna salantang galah

Ngulati gumi gemah ripah

Kemu mai élah

Idupé bungah

                      (Ki Jugul,16/06/2021)